ഗൂഗിള്‍ സൗജന്യ WiFi സേവനം അവസാനിപ്പിച്ചാലും സ്റ്റേഷനുകളില്‍ WiFi ലഭ്യമാക്കുമെന്ന് റെയില്‍വേ
വൈ ഫൈ സ്റ്റേഷന്‍ പദ്ധതി ഈ വര്‍ഷം അവസാനത്തോടെ അവസാനിപ്പിക്കുമെന്നായിരുന്നു ഗൂഗിള്‍ വ്യക്തമാക്കിയത്. 400ല്‍ അധികം റെയില്‍വേ സ്റ്റേഷനുകളില്‍ നടപ്പിലാക്കിയ പദ്ധതിയാണ് അവസാനിപ്പിക്കുന്നതായി ഗൂഗിള്‍ വ്യക്തമാക്കിയത്. റെയില്‍വേയുടെ ഗൂഗിളുമായുള്ള കരാര്‍ അവസാനിക്കുന്നത് 2020 മേയ് മാസത്തിലാണ്.
ഇന്ത്യന്‍ റെയില്‍വേയും റെയില്‍ടെല്‍ കോര്‍പ്പറേഷനുമായി ചേര്‍ന്നായിരുന്നു ഗൂഗിള്‍ പദ്ധതി നടപ്പിലാക്കിയിരുന്നത്. തടസ്സമില്ലാത്ത വൈഫൈ സംവിധാനം സ്റ്റേഷനുകളില്‍ ഉറപ്പാക്കുമെന്ന് റെയില്‍വേ വ്യക്തമാക്കി. ഗൂഗിള്‍ വൈഫൈ സേവനം നല്‍കിയിരുന്ന 415 സ്റ്റേഷനുകളിലും റെയില്‍ ടെല്‍ വൈഫൈ ഒരുക്കും. രാജ്യത്തെ 5600ല്‍ അധികം സ്റ്റേഷനുകളില്‍ റെയില്‍ടെല്‍ ആണ് സൗജന്യമായി വൈഫൈ സേവനം നല്‍കുന്നത്. യാത്രക്കാര്‍ക്ക് വൈഫൈ ഇല്ലാത്ത് മൂലം ഒരു വിധത്തിലുള്ള ബുദ്ധിമുട്ടുണ്ടാവില്ലെന്നും റെയില്‍ ടെല്‍ വ്യക്തമാക്കി.
2015ല്‍ ആരംഭിച്ച സേവനം നിര്‍ത്തുകയാണെന്ന് ഗൂഗില്‍ വൈസ് പ്രസിഡന്‍റ് സീസര്‍ സെന്‍ഗുപ്ത നേരത്തെ വ്യക്തമാക്കിയിരുന്നു. മൊബൈല്‍ ഡാറ്റ സേവനങ്ങള്‍ ചെലവ് കുറഞ്ഞ നിരക്കില്‍ ലഭ്യമായതോടെ ഫ്രീ വൈഫൈയുടെ ആവശ്യം ഇനിയില്ലെന്നാണ് ഗൂഗിള്‍ വിലയിരുത്തുന്നത്. ഈ വര്‍ഷത്തോടെ സേവനം നിര്‍ത്തുമെന്നും സീസര്‍ സെന്‍ഗുപ്ത വിശദമാക്കിയിരുന്നു.
2015 സെപ്റ്റംബറില്‍ ഗൂഗിൾ പ്രഖ്യാപിച്ച പദ്ധതി ജൂൺ 2018 ഓടെയായിരുന്നു വിജയകരമായി പൂർത്തിയാക്കിയത്. ഗൂഗിള്‍ ഫ്രീ വൈഫൈ പ്രഖ്യാപിച്ചതിന് ഒരുവര്‍ഷം പിന്നാലെയാണ് മുകേഷ് അംബാനി ജിയോ ആരംഭിച്ചത്. കുറഞ്ഞ വിലയില്‍ 4ജി ഡാറ്റയായിരുന്നു ജിയോ ഉപയോക്താക്കള്‍ക്ക് നല്‍കിയത്. ഇത് മറ്റ് ഉപയോക്താക്കള്‍ക്കും താരിഫുകള്‍ കുറക്കാന്‍ നിബന്ധിതരാക്കിയിരുന്നു.
