കംപ്യൂട്ടറിലെ ടെക്സ്റ്റ് എഡിറ്റിങ് എളുപ്പമാക്കിയ ലാറി ടെസ്‌ലർ അന്തരിച്ചു.

കംപ്യൂട്ടറിലെ ടെക്സ്റ്റ് എഡിറ്റിങ് എളുപ്പമാക്കിയ ലാറി ടെസ്‌ലർ അന്തരിച്ചു.

കംപ്യൂട്ടറിലെ ടെക്സ്റ്റ് എഡിറ്റിങ് പല മടങ്ങ് എളുപ്പമാക്കിയ എൻജിനീയർ ലാറി ടെസ്‌ലർ അന്തരിച്ചു. സെറോക്‌സ് (Xerox) കമ്പനിയുടെ ഗവേഷകനായിരുന്ന അദ്ദേഹം പിന്നീട് ആപ്പിള്‍, യാഹൂ, ആമസോണ്‍ തുടങ്ങിയ പല കമ്പനികള്‍ക്കു വേണ്ടിയും പ്രവര്‍ത്തിച്ചിട്ടണ്ട്. 1945ല്‍ ആണ് അദ്ദേഹം ജനിച്ചത്. സ്റ്റാന്‍ഫെഡ് യൂണിവേഴ്‌സിറ്റിയില്‍ റിസേര്‍ച് അസിസ്റ്റന്റായിരുന്ന കാലത്തു തന്നെ പ്രശസ്തനായ അദ്ദേഹം തന്റെ അവസാന കാലത്ത് ആര്‍ട്ടിഫിഷ്യല്‍ ഇന്റലിജന്‍സ്, കോഗനിറ്റീവ് മോഡലിങ്, സിംബോളിക് പ്രോഗ്രാമിങ് ഭാഷകള്‍ തുടങ്ങിയവയുമായി ബന്ധപ്പെട്ട് പ്രവര്‍ത്തിക്കുകയായിരുന്നു.

മോഡല്‍ലെസ് എഡിറ്റിങ്, കട്ട്, കോപ്പി, പെയ്സ്റ്റ് തുടങ്ങിയവയുടെ സൃഷ്ടാവെന്ന പേര് അദ്ദേഹത്തിനാണ്. സെറോക്‌സിന്റെ ഗവേഷകനായിരുന്ന സമയത്താണ് ടെസ്‌ലര്‍ ഇതു കണ്ടുപിടിക്കുന്നത്. ഫൈന്‍ഡ് ആന്‍ഡ് റീപ്ലെയ്‌സിന്റെ സൃഷ്ടിയിലും അദ്ദേഹത്തിന്റെ സംഭാവനയുണ്ട്. പേജ് ലേഔട്ട് സിസ്റ്റം, നോട്ട്‌ടേക്കര്‍ (Notetaker) എന്ന കംപ്യൂട്ടറിന്റെ സൃഷ്ടി തുടങ്ങിയവയിലെല്ലാം അദ്ദേഹത്തിന്റെ മിടുക്കു കാണാം.

കട്ട്, കോപ്പി, പെയസ്റ്റ് തുടങ്ങിയ എഡിറ്റിങ് രീതികള്‍ വന്നതോടെ കംപ്യൂട്ടറില്‍ ജോലി ചെയ്യുക എന്നത് വളരെ എളുപ്പമാകുകയായിരുന്നു. ഇവ ഇല്ലാതെയുള്ള എഡിറ്റിങ് ഇന്ന് ആര്‍ക്കും ചിന്തിക്കാന്‍ പോലും സാധ്യമല്ല. ലാറി ടെസ്‌ലര്‍ക്ക് വിട പറയുമ്പോള്‍ കംപ്യൂട്ടിങ്ങിലെ സാധാരണക്കാര്‍ക്ക് പോലും ഉപകരിക്കുന്ന ഈ ഫീച്ചറാണ് എല്ലാവരുടെയും മനസ്സിലുള്ളത്. 

സോഫ്റ്റ്‌വെയറിന്റെ പ്രവര്‍ത്തനങ്ങളില്‍ ആകൃഷ്ടനായ അദ്ദേഹം കംപ്യൂട്ടിങ്ങിന്റെ പല ഗുണമേന്മകളും കൊണ്ടുവരുന്നതില്‍ വലിയ പങ്കുവഹിച്ചു. മൗസ് ക്ലിക്കുകളില്‍ പൂര്‍ണ്ണത കൊണ്ടുവരുന്നതടക്കം ഇന്ന് സ്വാഭാവികമായി തോന്നുന്ന പല ഫീച്ചറുകള്‍ക്കു പിന്നിലും ടെസ്‌ലറുടെ ചിന്തകളും പ്രവൃത്തിയുമുണ്ട്.

Related post