വിലക്കുറവുള്ള വൺപ്ലസ് സ്മാർട്ട്ഫോൺ, വൺപ്ലസ് നോർഡ്

വിലക്കുറവുള്ള വൺപ്ലസ് സ്മാർട്ട്ഫോൺ, വൺപ്ലസ് നോർഡ്

പ്രീമിയം സ്മാർട്ഫോൺ നിർമാതാക്കളായ വൺപ്ലസിന്റെ ആദ്യ ‘മിഡിൽ ക്ലാസ്’ ഫോൺ വൺപ്ലസ് നോർഡ് ബുക്കിങ് തുടങ്ങി.  നോർഡ് എന്നാൽ നോർത്ത്. പുരോഗതിയിലേക്കു പോകുന്നു, പുതിയ ദിശാബോധത്തോടെ കുതിക്കുന്നു എന്നൊക്കെ അർഥം വരുത്താൻ ‘നോർത്തി’നു കഴിയും (going north).30,000 രൂപയ്ക്കുമേൽ വിലയുള്ള പ്രീമിയം ഫോൺവിഭാഗത്തിൽ തിളങ്ങിനിന്ന വൺപ്ലസിന്റെ മോഡലുകൾ ഇക്കൊല്ലം അതുക്കുംമേലേ വിലയുള്ള അൾട്രാപ്രീമിയം വിഭാഗത്തിലേക്കുപോയിരുന്നു. 20,000–30,000 രൂപ വിലയുള്ള വിഭാഗത്തിലേക്കു നോക്കുന്ന വലിയൊരു യുവജനക്കൂട്ടത്തെ അവഗണിച്ചങ്ങനെപോയാൽ ശരിയാകില്ലെന്ന് കമ്പനി കൃത്യമായി വിലയിരുത്തി. 8, 8പ്രോ മോഡലുകളുടെ ഹണിമൂൺ കഴിയുംമുൻപുതന്നെ നോർഡ് വന്നത് അങ്ങനെയാണ്.

ഇപ്പോൾ നിങ്ങൾക്ക് വാങ്ങാവുന്ന വൺപ്ലസ്സിന്റെ ഏറ്റവും വിലക്കുറവുള്ള പ്രീമിയം സ്മാർട്ട്ഫോൺ ആയാണ് നോർഡിന്റെ വരവ്. ഇന്ത്യയ്ക്കുവേണ്ടി പ്രത്യേകം തയ്യാറാക്കിയ 6 ജിബി റാം + 64 ജിബി സ്റ്റോറേജ് പതിപ്പാണ് വൺപ്ലസ് നോർഡിന്റെ ഹൈലൈറ്റ്. 8 ജിബി റാം + 128 ജിബി സ്റ്റോറേജ്, 12 ജിബി റാം + 256 ജിബി സ്റ്റോറേജ് എന്നീ 2 പതിപ്പുകളിലും വൺപ്ലസ് നോർഡ് ലഭ്യമാണ്. 6 ജിബി റാമുള്ള ഇന്ത്യയ്ക്കായി പ്രത്യേകം തയ്യാറാക്കിയ നോർഡ് പതിപ്പിന്റെ വിൽപ്പന സെപ്റ്റംബറിൽ മാത്രമേ ആരംഭിക്കൂ. അതെ സമയം 8 ജിബി റാം, 12 ജിബി റാം പതിപ്പുകളുടെ ഓൺലൈൻ വില്പന അടുത്ത മാസം 4-ന് ആമസോൺ, വൺപ്ലസ് വെബ്‌സൈറ്റുകളിലൂടെ ആരംഭിക്കും. അമേരിക്കൻ എക്സ്പ്രസ്സ് കാർഡ് വഴി വൺപ്ലസ് നോർഡ് വാങ്ങുന്നവർക്ക് 2,000 രൂപയുടെ ഡിസ്‌കൗണ്ടും പ്രഖ്യാപിച്ചിട്ടുണ്ട്.

വിലക്കുറവുള്ള വൺപ്ലസ് സ്മാർട്ട്ഫോൺ നോർഡ് എങ്കിലും സ്പെസിഫിക്കേഷനുകളിൽ ഒട്ടും പിന്നിലല്ല നോർഡ്. അഡ്രെനോ 620 GPU-വുമായി ചേർന്ന് പ്രവർത്തിക്കുന്ന ഒക്ട-കോർ ക്വാൽകോം സ്നാപ്പ്ഡ്രാഗൺ 765G SoC പ്രൊസസ്സർ ആണ് വൺപ്ലസ് നോർഡിൽ. കഴിഞ്ഞ വർഷം ഡിസംബറിൽ പുറത്തിറങ്ങിയ ഈ പ്രോസെസ്സറിൽ ഇന്ത്യയിൽ ഇതുവരെ വിവോ X50 പ്രൊ 5ജി മാത്രമേ ലഭ്യമായിട്ടുള്ളു. 90Hz റിഫ്രഷ് റേറ്റുള്ള 6.44-ഇഞ്ച് ഫുൾ എച്ഡി+ (1,080×2,400 പിക്സൽ) ഫ്ലൂയിഡ് അമോലെഡ് ഡിസ്പ്ലേയാണ് വൺപ്ലസ് നോർഡിന്റെ മറ്റൊരു ആകർഷണം. 20:9 ആണ് ആസ്പെക്ട് റേഷ്യോയുള്ള ഈ ഡിസ്‌പ്ലേയ്ക്ക് കോർണിങ് ഗൊറില്ല ഗ്ലാസ് 5 സുരക്ഷയുമുണ്ട്.

48 മെഗാപിക്സൽ സോണി IMX586 പ്രൈമറി സെൻസർ (f/1.75 ലെൻസ്), 8 മെഗാപിക്സൽ സെക്കന്ററി സെൻസർ (അൾട്രാ-വൈഡ്-ആംഗിൾ ലെൻസ്), 5 മെഗാപിക്സൽ ഡെപ്ത് സെൻസർ, 2 മെഗാപിക്സൽ f/2.4 മാക്രോ ലെൻസ് എന്നിവ ചേർന്ന ക്വാഡ് പിൻ കാമറ സെറ്റപ്പ് ആണ് നോർഡിന്. മാത്രമല്ല ഏറ്റവും കൃത്യതയുള്ള ഫോട്ടോകൾക്കും വിഡിയോകൾക്കുമായി പ്രധാന സെൻസറിന് ഒപ്റ്റിക്കൽ ഇമേജ് സ്റ്റെബിലൈസേഷൻ (OIS) സപ്പോർട്ടുമുണ്ട്. സെൽഫി, വീഡിയോ കോളിംഗ് എന്നിവയ്ക്കായി 32-മെഗാപിക്‌സൽ പ്രൈമറി ക്യാമറയും 8-മെഗാപിക്സൽ സെക്കന്ററി ഷൂട്ടറും (വൈഡ് ആംഗിൾ) ചേർന്ന ഡ്യുവൽ ക്യാമെറയാണ് നോർഡിന്റെ മുൻപിൽ ക്രമീകരിച്ചിരിക്കുന്നത്. വൺപ്ലസ് 8 സ്മാർട്ട് ഫോണിനുപോലും ഡ്യുവൽ സെൽഫി സംവിധാനമില്ല.

2 നാനോ സിമ്മുകൾ പ്രവർത്തിപ്പിക്കാവുന്ന വൺപ്ലസ് നോർഡ് ആൻഡ്രോയിഡ് 10 അടിസ്ഥാനമാക്കിയ ഓക്‌സിജൻഓഎസ് 10.5 ഓപ്പറേറ്റിംഗ് സിസ്റ്റത്തിലാണ് പ്രവർത്തിക്കുന്നത്. ബ്ലൂ മാർബിൾ, ഗ്രേയ്‌ ഓനിക്സ് എന്നിങ്ങനെ രണ്ട് നിറങ്ങളിലാണ് വൺപ്ലസ് നോർഡ് വില്പനക്കെത്തിയിരിക്കുന്നത്. 30W വാർപ് ഫാസ്റ്റ് ചാർജിങ് സപ്പോർട്ടുള്ള 4,115mAh ബാറ്ററി ആയിരിക്കും വൺപ്ലസ് നോർഡിന്. 256 ജിബി UFS 2.1 സ്റ്റോറേജ് പക്ഷെ വർദ്ധിപ്പിക്കാൻ സാധിക്കില്ല. 5ജി , 4ജി എൽടിഇ, വൈ-ഫൈ 802.11ac, ബ്ലൂടൂത്ത് v5.1, ജിപിഎസ്/ എ-ജിപിഎസ്/ NavIC, എൻഎഫ്സി, യുഎസ്ബി ടൈപ്പ്-സി പോർട്ട് എന്നിവയാണ് കണക്ടിവിറ്റി ഓപ്ഷനുകൾ.

Related post