സ്മാർട് ഫോണുകൾക്ക് ഇനി ഓഫറുകൾ കിട്ടില്ല, ഇളവുകൾ നിർത്താന്‍ കേന്ദ്ര സർക്കാർ

സ്മാർട് ഫോണുകൾക്ക് ഇനി ഓഫറുകൾ കിട്ടില്ല, ഇളവുകൾ നിർത്താന്‍ കേന്ദ്ര സർക്കാർ

ഇടത്തരം സ്മാര്‍ട് ഫോണുകള്‍ക്കു പോലും 2,000-3,000 രൂപ ഇളവ് ലഭിച്ചിരുന്നതിനാല്‍ പലരും ഫോണുകള്‍ വാങ്ങാനായി ഓണ്‍ലൈന്‍ സ്ഥാപനങ്ങളെയാണ് ആശ്രയിച്ചിരുന്നത്. എന്നാല്‍, ഓണ്‍ലൈനില്‍ ഇനിയും ഫോണ്‍ ലഭിക്കുമെങ്കിലും ഡിസ്‌കൗണ്ട് ഉണ്ടായേക്കില്ല എന്നാണ് പുതിയ വാര്‍ത്തകള്‍ പറയുന്നത്. വന്‍ ഡിസ്‌കൗണ്ടില്‍ ഫോണുകളും മറ്റും ഓണ്‍ലൈനില്‍ വിറ്റുകൂടാ എന്ന സർക്കാർ നിബന്ധന പ്രാബല്യത്തില്‍ വരാന്‍ പോകുന്നു. സർക്കാരിന്റെ പുതിയ നീക്കം ഫോണ്‍ നിര്‍മ്മാതാക്കളെയും സമ്മര്‍ദ്ദത്തിലാക്കുന്നതാണ്.

പലപ്പോഴും ഹാന്‍ഡ്‌സെറ്റ് നിര്‍മ്മാതാക്കള്‍ നേരിട്ടാണ് ഓണ്‍ലൈനില്‍ വിലക്കുറവ് സാധ്യമാക്കിയിരുന്നത്. ഇത്തരം നിര്‍മ്മാതാക്കളെ ബഹിഷ്‌കരിക്കാന്‍ ഓഫ്‌ലൈന്‍ കടക്കാര്‍ തീരുമാനിച്ചതോടെ വില ഏകീകരിക്കാന്‍ തന്നെയാണ് വിവിധ ബ്രാന്‍ഡുകളുടെ തീരുമാനം. ഇപ്പോഴും കൂടുതല്‍ ഫോണുകള്‍ വില്‍ക്കുന്നത് ഓഫ്‌ലൈനിലാണ് എന്നതാണ് നിര്‍മ്മാതാക്കള്‍ കടക്കാരുടെ ഭീഷണിക്കു വഴങ്ങാനുള്ള പ്രധാന കാരണം. ഓണ്‍ലൈനില്‍ ഏകദേശം 40 ശതമാനം ഫോണുകളാണ് വിറ്റുപോകുന്നതെങ്കില്‍ കടകളിലൂടെയാണ് 60 ശതമാനം ഫോണുകളും വില്‍ക്കുന്നത് എന്നത് നിര്‍മ്മാതാക്കള്‍ക്ക് അവഗണിക്കാനാകാത്ത കാരണമാണ്. ഇതിനാല്‍, നിര്‍മ്മാതാക്കള്‍ ഇനി വില ഓണ്‍ലൈനിലും ഓഫ്‌ലൈനിലും ഒരു പോലെ നടപ്പിലാക്കിയേക്കും.

ഓണ്‍ലൈന്‍ എക്‌സ്‌ക്ലൂസീവ് ഡീലുകളിലായിരുന്നു ഏറ്റവുമധികം വിലക്കുറവ് നല്‍കി വന്നിരുന്നത്. എന്നാല്‍ സമ്മര്‍ദ്ധത്തെത്തുടര്‍ന്ന് ഷഓമി, സാംസങ്, വിവോ, ഒപ്പോ, റിയല്‍മി തുടങ്ങിയ ബ്രാന്‍ഡുകള്‍ എക്‌സ്‌ക്ലൂസീവ് വില്‍പ്പന നിർത്താനൊരുങ്ങുകയാണ്. വിവോ, സാംസങ്, ഒപ്പോ എന്നീ കമ്പനികള്‍ ഇപ്പോള്‍ത്തന്നെ ഓഫ്‌ലൈന്‍ വില്‍പ്പനയ്ക്കാണ് പ്രാധാന്യം നല്‍കുന്നത്. ഇവര്‍ താമസിയാതെ ഓണ്‍ലൈനില്‍ ഒരു ഇളവും നല്‍കാതിരുന്നേക്കുമെന്നു പറയുന്നു.

Related post